Una lesna, du spag,
un martel e di chiuldin
Ien quisch’è gli ingredient
chi fan ed Flep un scarpulin.
Ma semplice, generus e d’amur rec
L’è semper sta l’animo dal zin Flep.
Tanti volt, la genta,
che in saivan brisa c’à fossa su nvu,
i me dmandavan se asaiva
dova u steva u scarpulin piò famus
A gh’indicava la via cuntent
e urguglius ma a’gfeva capir
che del me zio a iera gelus
Quaic volta, la matina d’istaa,
inveci d’andar cun me zin Ricci
in ti grot a rastlar
A scapava a ca d’ bog dal zin Flep,
ch’em piasiva senter
el so sturieli cuntar
E guardal menter u steva a lavurar
Un bancat ed lagn, una vechia morsa
e le scarp arsuladi loster a puntin
Prunti da cunsgnar
Ieren e bigliat da visita dun om che
a st’mond u s’è semper fat rispetar
Em parlava dla zia Giolia,
del so fioli e di nvu
E semper surident em giva
che la famiaa
L’e stada per la so veta l’amur
e la so pio bela meraviaa
Em parlava surident che i temp,
qui di gioven, ien asaa cambiaa:
adesa che e gh’è e beneser
us pasa tant temp a e bar
e mia pio in primavera
in ti camp ad armundar.
“Pasar mez’ura cun un vech
ad ascultar coma ieren alura
i so temp ennè pio
impurtant, sat, per vuater gioven
al temp leber l’è semper pio latitant”
Em parlava po d’la guera
ed tot qual che gh’è capita
E i pio brot mument
che in cl’inferen la duvu supurtar
Aver fat cun orgolio u suldaa in ti alpin, cu l’ha fat sentir un om ver,
l’è staa un quel impurtant
E matse ancora e capel cun la pana
per lu l’era semper emuziunant
L’ha scret in rema ed la so veta,
de so paes e d’la so genta,
poesie e filastroc
E a pens che simpatic coma l’era
al naree scret per bucasol e per i toc
Ma adesa, zio flep,
vultama mo pagina
E fnamla ed cridar che a samaa tot
chè c’a te vlama ringraziar
A nom ad tot a te vlama sul dir
Che l’è semper sta bel
e un unur i to racunt sentir
E se a turnama so adesa
in tla butega Ed flep u scarpulin
A sentiram ancora
e martel bater i chiuldin.

Dadicata a me zin flep